ফিত্তি

সোনাত্তালিবো মোনে-জুমে পাড়ায়-আদামে উড়ি উড়ি বেরেহ'দ,

সে লগে পত্তাপত্তিবো মানেই'লগহ্ মনত রঙ চিদি যেহ্'দ।

যিদ্দুর ভেত্ পেই, এক পাল চিদিরে-বদরা চামবলা এমান

সোম্মোন হিলোত, লগে এক ঝাঁক নাদঙসারা পুক ।

নুও পরঙি এমানুনে খাজাত ভরেয়

লুগেয় থোয়োন রঙচঙ্গে সোনাত্তালিবু,

নাদঙসারা পুকঃকুনে কামেরেয়

খেয়োন পত্তাপত্তিবোর এক কত্তা ডোহ্ ।

আমা বেগর রঙচঙ্গে সোনাত্তালিবো ছড়ান্ গরিহ্

লগে পত্তাপত্তিবো যত্তন গরি ফিরেয় আনিবার উদিজে,

আমি যেক্কে লদ্ দিলোঙ ছড়া ফারি, মোন উহদি; এক্কান

রাইন্যেত লুমি চাঙগে, জুমো ফুলুনে উচ্চোয়া তুলি দেদন । 

জুমো ফুলুনে পহ্'দ পাজারাত গজ্জেই পরি পরি কদন্দে,"গাবুজ্জে'লগ,

পত্তাপত্তিবো আমা বুগোত এইনে ন'বজানার মনডুগে আমি ঝরি পজ্জেই; 

তে এলেহ্ আমি নুও গরিহ্ গাজত্ ফুদিবোঙ ।" শিমেত্তুলো গাচ্ছো

তরাত্তাঙুরি কলহ্'দে, সোনাত্তালিবো এয়নেই ঢেলাত নবলেহ্ তুলো ন'উড়েম হিলোত ।

তারারে কধা দিনেইয় লদ্ দেদে ন'দেদে, নুও জুমানে দুচ্ ধরি কলহ্'দে, 

"সে সিদিরে-বদরা এমান্নে খুচ্ দিলে মুই এক শিজে ধান নদিম ।"

তা লগে লগে মোন-মুরোগুন বেক্কুনে এক রঃ ওই মাদি উদিলাক,

"গলি যেম,  ভাঙি যেম, সে নাদঙসারা পুক'উন যুনি ম'বুগোত্তুন বচ্ ন'যান।"

জুমো ধাক্ক্যে বাজদুবোবোত্তুন এক সাজ্ বাচ্চরি থোগেই খেয়, 

ছড়ানাল্লোত গাদি, মোন আভা ক্যেইয়্যাত গুলি, মুই নে ফিরি যেদুঙ

লঘে সোনাত্তালিবো আহ্ পত্তাপত্তিবো ন নেযেয়; মুই নে ফিরি যেদুঙ?

হিলোত্তুন সে সিদিরে-বদরা এমানুন বচ্ ন'নেযেয়, নাদঙসারা পুক'উন ন'ধাবেইয়?