অলে জাইত্তে চিগোন কিচ্ছুত্তেই

মুই অলে জাইত্তে চিগোন কিচ্ছুত্তেই মরি যেম

চিগোন খের’ ফুলোত্ত্যেই, 

এককোঅ্ ঢুলোঙ-দালাঙ সিরোপানি ফুদোত্তেই

মুই অলে মরি যেম দগিনো বয়েরত উরি যেইয়্যে 

এক্কান ফুলো পাঘোরত্তেই,

বারিজের একফুদো ঝরত্তেই

মুই অলে জাইত্তে চিগোন কিচ্ছুত্তেই মরি যেম

গুলচোধুরি শিয কারানাত্তেই, চিত্তি’ছ গালত টুপ পরানাত্ত্যায়

মুই অলে মরি যেম

কারর চোগোমনিত ফুদি থেইয়্যে একফুদো নুনজোত্তেই

একফুদো রোদত্তেই

মুই অলে জাইত্তে চিগোন কিচ্ছুত্তেই মরি যেম 

এক সিত্তে জুন’পরত্তেই, এক কত্তা মেঘত্তেই

মুই অলে মরি যেম মুরো তুগুনোত

আহ্জি যেইয়্যে এককোঅ্ পত্তাপত্তিত্তেই

ফুদোমুলো য়েল চেবাত্তেই

মুই অলে জাইত্তে চিগোন কিচ্ছুত্তেই মরি যেম

জাইত্তে চিগোন একখান সবনত্তেই

অমগদ চিগোন একখান দুঘোত্তেই

মুই অলে মরি যেম ঘুমে ঘুমে  

চিগোন এককোঅ্ বর নিঝেজত্তেই

একফুদো দোলত্তেই

মূলঃ আমি সম্ভবত খুব ছোট্ট কিছুর জন্য - হুমায়ুন আজাদ