কনসেন্ট্রেশন ক্যাম্প

তা চোখকুন বানা অলহ্

বথজদার পত্তম লাদিত লো ধারা ধারা

অলহ্ তা মুয়ান

বাদাহ্ যেয়্যা ফাদি যেয়্যা ঠুত্তুন লেত্তো–

লোয় এগত্তর ওই সরবর

জিলান লারেয়্যাও দি'ভে ভাঙিযেয়ে দাত্

ঝরিহ্ প'লাক পাক্কাত

মা… ওহ্ মা….. কিজেক কারি উদিলো তে

পাচশত পাচপান্ন মার্কা আতধান্ -

খেইয়্যা এককোঅ্  সিগেরেত

পত্থমে বাঝিলো তা বুগোত

পুরিহ্ যেয়্যা এরার বে'ভহ্ বাচ্চান

চিদিহ্ পলহ্ গোদা ঘরানত্ গল গলেই

রাঙা চিকচিক সিগেরেত্তুয়্যা

তা ক্যেইয়েত গুলগুল্লে আঙ্কুরহ্

ধক ফঝা তুলো ধরিলো

দি'পল্লা লাদিত বাদোলহ্

ধক বেঙা ওই গেল্ ক্যেইয়ে,

এ পল্লা তে ওমাখদা গুরি ন'পারিলোহ্

তারে গোজ্জেই ফেলা অলহ্ ।

পেদহ্ উগুরে উদিলো দি জুর্ বতজদা,

কালা আহ কোচকোচ্চে।

গদি অলদে, তে ভারাল্অ দুঘো

কধা কোয়েদে ,

কোয়েদে খেই নপানা আ পেতপরা কধা

তে তা ক্যেইয়েত কাবর্-চুবোর্ নথানা

কধা কোয়েদে–

অলে সে-গদিয়ে ফর্ ফর্

গরি টানি ফাদি লো অলহ্ তা

সিলুম

প্যান্ট হুলি লো অলহ্ । ইক্কু তে

লাঙতা , বেধক্

তা দি'আন আহ্ত-মুট গজ্জে-যে আহ্ত

মিছিলোত বাগদা

ধক উজ্জে গেকগেজি উত্ত্যে

যে আহ্দে তে পোস্টার লাগেয়ে,

ছিদি দে লিফলেট,

লোহ্ মাত্তললোই সে আহ্ত

ভাঙা অলহ্ ।

সে যেদা আহ্ত , যেদা মানজো

আহ্ত।

তা দশচু আঙুল্ -

যে-আঙুলুন্দোই ধরি চেয়ে তাম্মা মুয়ান,

ভেইয়োর ক্যেইয়ে,

পরানবির থুগুরিত তিল্

যে -আঙুলোত ধজ্জে সঙ্ বুঝুনো

সমাজ্জ্যার আহ্ত ,

স্ববন বুনিবার আত্ত্যের,

শিললোই সে-আঙুলুন বাদি দে অলহ্

সে যেদা আঙুল্ , মানেয়োর যেদা সাঙসারা

লোহ চারিলোই,

এককোঅ্  এককোঅ্  গুরি উগুরা অলহ্

দুচ্ ন্যেয়ে নখকুন।

কি দোল রাঙা লো রঙ

তে ইক্কু মজ্জ্যে

তা ক্যেইয়ে ঘিরি

থুব থুব কিষ্ণচূরো ধক

চিদি আঘে লো ,

পতপত্তে রাঙা লো।

তা বাদা যেয়ে এক্কান আহ্ত

পুরি আঘে এ'দেজহ ম্যাপ'আনহ্ উগুরে

আহ সে আহ্ত্তানত্তুন ঝুরি পরের লোর

ঘ্যা পাত্যে লাভা …. 

মূল: কনসেন্ট্রেশন ক্যাম্প - রুদ্র মুহাম্মদ শহীদুল্লাহ্